الإستقلال وروح الوطنيِّة!
سقراط دُربيِّة
25 نوفمبر 2016
أنباء الشباب
دبِّت روح الوطنيِّة
بذكرى عيد الإستقلال
كلّ واحد روى خبريِّه
وعامِل حالُه من الأبطال
كلمة ولحن وغِنِّيِّة
لْشهيد من حياتُهْ آستقال
المبادرة بتبقى فردِيِّة
ودعمِة زغيرِة بالمال
الهدف نُصنَع قضِيِّة
لشعب مْقطّع الأوصال
آنسينا إنُّهْ الهوِيِّة
مْغَمَّسِة بدمّ الأطفال
حرب الإلغاء والطَّائفيِّة
بعدَهْا بتمرق عالبال
صارت الذكرى مسرحيّة
بتتوارثْ مع الأجيال
(أنباء الشباب، الأنباء)